ବଲିଉଡ ଅଭିନେତା ଅଜୁର୍ନ ରାମପାଲଙ୍କ ଘରେ ଚଢ଼ଉ କଲା ଏନସିବି

ମୁମ୍ବାଇ, (ଓଡିଶା ଟାଇମ୍) :ଅଭିନେତା ସୁଶାନ୍ତ ସିଂହ ରାଜପୁତ ଆତ୍ମହତ୍ୟା ମାମଲାରେ ଡ୍ରଗ୍ସ କାରବାର ପ୍ରସଙ୍ଗ ଆସିବା ପରଠାରୁ ନାର୍କୋଟିକ୍ସ କଣ୍ଟ୍ରୋଲ୍ ବ୍ୟୁରୋ (ଏନସିବି) କଡ଼ା କାର୍ଯ୍ୟାନୁଷ୍ଠାନ ଆରମ୍ଭ କରିଛି। ଏହି ସଂସ୍ଥା ସିନେମା ଜଗତ ସହ ଜଡିତ ସେଲିବ୍ରିଟିମାନଙ୍କ ଘର ଉପରେ କ୍ରମାଗତ ଭାବରେ ଚଢଉ କରୁଛି ଏବଂ ଡ୍ରଗ୍ସ ବେପାରୀଙ୍କ ଉପରେ  କଡା ନଜର ରଖିଛି।

ଏହି ପରିପ୍ରେକ୍ଷୀରେ ସୋମବାର ଏନସିବି ବଲିଉଡ ଅଭିନେତା ଅର୍ଜୁନ ରାମପାଲଙ୍କ ଘରେ ଚଢଉ କରିଛି। ଏହାପୂର୍ବରୁ ଏହି କେନ୍ଦ୍ରୀୟ ଏଜେନ୍ସି ବଲିଉଡର ଅନେକ ସେଲିବ୍ରିଟିଙ୍କ ଘରେ ଚଢଉ କରିଥିଲା।

ଏନସିବି ଅଧିକାରୀମାନେ ଚଢଉ ପାଇଁ ମୁମ୍ବାଇର ବାନ୍ଦ୍ରାସ୍ଥିତ ରାମପାଲଙ୍କ ଘରେ ପହଞ୍ଚିଥିଲେ। ସୋମବାର ସକାଳେ ଅଧିକାରୀମାନେ ରାମପାଲଙ୍କ ଘରେ ପହଞ୍ଚିଥିଲେ। କୁହାଯାଉଛି ଯେ ଏନସିବି ଅଭିନେତାଙ୍କ ଘରେ ଡ୍ରଗ୍ସ ଖୋଜୁଛି। ସୁଶାନ୍ତ ମୃତ୍ୟ ମାମଲାରେ ଡ୍ରଗ୍ସ ଲିଙ୍କ ସାମ୍ନାକୁ ଆସିବା ପରେ ଏନସିବି ଡ୍ରଗ୍ସ କାରବାର ବିଷୟରେ ଫିଲ୍ମ ଇଣ୍ଡଷ୍ଟ୍ରିରେ ଖୋଳତାଡ ଆରମ୍ଭ କରିଛି।

ଗତ ମାସରେ ଏହି ସଂସ୍ଥା ଡ୍ରଗ୍ସ ମାମଲାରେ ରାମପାଲଙ୍କ ଗର୍ଲଫ୍ରେଣ୍ଡ ଗାବ୍ରିଏଲାଙ୍କ ଭାଇ ଆଗିସିଲୋସ ଡେମେଟ୍ରିଏଡଙ୍କୁ ଗିରଫ କରିଥିଲା। ଆଗିସିଲୋସରୁ ହାଶିଶ ଏବଂ ଆଲପ୍ରାଜୋଲାମ ଟାବଲେଟ ମିଳିଥିଲା। ଏହି ଦୁଇଟି ଜିନିଷକୁ ନାର୍କୋଟିକ୍ସ ପକ୍ଷରୁ ନିଷେଧ କରାଯାଇଛି। ଓମେଗା ଗୋଡୱିନ୍ ନାମକ ଜଣେ ବ୍ୟକ୍ତିଙ୍କୁ ମୁମ୍ବାଇରେ କୋକେନ ଯୋଗାଣ ଅଭିଯୋଗରେ ଗିରଫ କରାଯାଇଥିଲା ଓ ଆଗିସିଲୋସଙ୍କ ସମ୍ପର୍କରେ ତଥ୍ୟ ମିଳିଥିଲା।

Leave a Reply