ବିଷ୍ଣୁ କ’ଣ ଭିଜିଲାନ୍ସ ଡାଇରେକ୍ଟର: ଦାମ

0
316

ଭୁବନେଶ୍ୱର,(ଓଟି): ବିଜେଡିରୁ ବହିଷ୍କୃତ ହୋଇଥିବା ଡା. ଦାମୋଦର ରାଉତ ୧୯୭୪ ମସିହାରେ ଖପୁରିଆରେ ଭେଟେରିନାରୀ ଷ୍ଟୋର୍ ଇନ୍‌ଚାର୍ଜ ଥିବା ବେଳେ ବଡ଼ ଧରଣର ଦୁର୍ନୀତି ହୋଇଥିଲା ବୋଲି ଦାମଙ୍କ ପାରମ୍ପରିକ ପ୍ରତିଦ୍ୱନ୍ଦ୍ୱୀ ତଥା ଜଗତସିଂହପୁର ଜିଲ୍ଲା ବିଜେଡି ସଭାପତି ବିଷ୍ଣୁ ଦାସ ଆଜି ଯେଉଁ ଅଭିଯୋଗ କରିଥିଲେ ଦାମ ତାର କଡା ଜବାବ ରଖିଛନ୍ତି।

ଦାମ କହିଛନ୍ତି, ବିଷ୍ଣୁ କ’ଣ ସେ ସମୟରେ ଭିଜିଲାନ୍ସ ଡାଇରେକ୍ଟର ଥିଲା? ୧୯୭୪ ମସିହାରେ ତା’ର ନାବାଳିକି ଫିଟିନଥିବ, ଆଉ ମୋ ବିଷୟରେ ସେ କ’ଣ କହୁଛି? ମୁଁ ଭେଟରିନାରୀ ୧୯୬୮ ମସିହାରୁ ପାସ୍‌ କରିଥିଲି। ପରେ ୬ ବର୍ଷ ଇନ୍‌ଫର୍ମେସନ୍‌ ଅଫିସର ଥିଲି। ଆଉ କେବେ ସିମେନ୍‌ ଦାୟିତ୍ୱରେ ଥିଲି, ଚୋରି ହୋଇଥିଲା? ବିଷ୍ଣୁ ଯଦି ବକ୍ସିବଜାରରୁ ସିମେନ୍‌ ଆଣି ପିଆପିଇ କରିଥିବ ମୁଁ ଜାଣିନି ବୋଲି ଦାମ ତାଙ୍କ ପ୍ରତିକ୍ରିୟାରେ କହିଛନ୍ତି।

ଇନ୍‌ଫର୍ମେସନ୍‌ ଅଫିସର ଥିବା ବେଳେ ମୋ ବିଭାଗର ଡାଇରେକ୍ଟରଙ୍କ ମାଧ୍ୟମରେ ବିଜୁ ପଟ୍ଟନାୟକ ମୋତେ ଡକାଇଥିଲେ ବୋଲି ଦାମ  କହିଛନ୍ତି ।୧୯୭୭ ରୁ ୮୦ ଭିତରେ ଜଗତସିଂହପୁର ବିଧାୟକ ଥିଲେ କଣ୍ଡୁରି ମଳିକ। ସେହି ଆସନ ପାଇଁ ଜଣେ ଶିକ୍ଷିତ ହରିଜନ ପିଲା ଖୋଜିବା ପାଇଁ ବିଜୁବାବୁ ମୋତେ କହିଥିଲେ। ସେହି ସମୟରେ ବିଷ୍ଣୁଙ୍କୁ ଦେବୀ ଚୌଧୁରୀ ନେଇ ବିଜୁବାବୁଙ୍କ ପାଖରେ ଚିହ୍ନାଇ ଥିଲେ। ଆଉ ସେଠାରୁ ଫେରିବା ପରେ ସେମାନେ ବିଧାୟକ କଣ୍ଡୁରି ମଳିକଙ୍କୁ ଚପଲରେ ମାଡ଼ ମାରିଥିଲେ। ଏହି ଘଟଣା ପ୍ରଚାରିତ ହେବା ପରେ ବିଷ୍ଣୁଙ୍କୁ ଟିକେଟ୍‌ ଦିଆଯାଇନଥିଲା।

୧୯୮୫ ମସିହାରେ ପୁଣି ଥରେ ପ୍ରାର୍ଥୀ ଖୋଜା ପଡ଼ିଥିଲା। ବିଜୁବାବୁଙ୍କ ପରାମର୍ଶରେ ମୁଁ ଗଲା ବେଳେ ଜଗତସିଂହପୁର ଜିଲ୍ଲା ସୋମନାଥ ହାଟର ଏକ କ୍ୟାବିନ୍‌ ଆଗ ବେଞ୍ଚରେ ବସି ବିଷ୍ଣୁ ଗୁଲୁଗୁଲା ଖାଉଥିଲା। ମୁଁ ତାକୁ ସେଠାରୁ ଡାକି ଆଣିଥିଲି। ପରେ ସେ ପ୍ରାର୍ଥୀ ହୋଇ ହାରିଥିଲା। ତା’ପରେ ୧୯୯୦ ମସିହାରେ ବିଜୟୀ ହୋଇଥିଲା। ମୁଁ ୧୯୭୭ ମସିହାରୁ ବିଧାୟକ ହୋଇ ୧୯୭୪ ମସିହାରେ ଦୁର୍ନୀତି କରୁଥିଲି ବୋଲି ସେ କେମିତି ଜାଣିଲା? ତେଣୁ ବିଷ୍ଣୁ ମୋର ସମାସ୍କନ୍ଧ ନୁହେଁ। ତେଣୁ ତା’ ବିଷୟରେ ମୋତେ କିଛି ପଚାରନ୍ତୁ ନାହିଁ। ସେ ମାତ୍ର ୬ ମାସ ମନ୍ତ୍ରୀ ହୋଇଥିଲା। ଭଲ ମନ୍ତ୍ରିମଣ୍ଡଳ ଚଲାଇଲା ବୋଲି ତାକୁ ପୁରସ୍କାର ମଧ୍ୟ ମିଳିଛି।

Loading...