‘ପରୀ’କୁ ହତ୍ୟା ପରେ ମୃତଦେହ ସହ ଦୁଷ୍କର୍ମ କରିଥିଲା ସରୋଜ: ଅରୁଣ ବୋଥ୍ରା

ଭୁବନେଶ୍ବର, (ଓଡିଶା ଟାଇମ୍) :ନୟାଗଡ ଯଦୁପୁରରେ ନାବାଳିକା ଦୁଷ୍କର୍ମ ଓ ହତ୍ୟା ମାମଲାର ମୁଖ୍ୟ ଅଭିଯୁକ୍ତ ସରୋଜ ସେଠୀକୁ ରିମାଣ୍ଡରେ ନେଇଛି କ୍ରାଇମବ୍ରାଞ୍ଚ ଏସଆଇଟି । ଏନେଇ ପ୍ରେସମିଟ୍ ଜରିଆରେ ସୂଚନା ଦେଇଛନ୍ତି କ୍ରାଇମବ୍ରାଞ୍ଚ ଏସଆଇଟି ମୁଖ୍ୟ ଅରୁଣ ବୋଥ୍ରା । ସରୋଜ ସେଠୀ ମୁଖ୍ୟ ଅଭିଯୁକ୍ତ ବୋଲି ଅରୁଣ ବୋଥ୍ରା କହିଛନ୍ତି । ୩ ଦିନ ରିମାଣ୍ଡରେ ଯାହା ନୂଆ ତଥ୍ୟ ଆସିବ ଆମେ ଅବଗତ କରାଇବୁ । ଅଭିଯୁକ୍ତକୁ କେଉଁ ମାନେ ସାହାଯ୍ୟ କରୁଥିଲେ ତାହାର ତଦନ୍ତ ଜାରି ରହିଛି ।

ଅରୁଣ ବୋଥ୍ରା କହିଛନ୍ତି ସରୋଜର ସାନ ଭଉଣୀ ପାଖକୁ ପରୀ ଆସେ । ଘଟଣା ଦିନ ସରୋଜ ଭଉଣୀ ପାଖକୁ ଏକୁଟିଆ ପରୀ ଯାଇଥିଲା । ସରୋଜର ଭଉଣୀ ଅଫିସ୍ ବାହାରିଯିବା ପରେ ପରୀ ସହ ଦୁଷ୍କର୍ମ ଉଦ୍ୟମ କରିଥିଲା ସରୋଜ । ପରୀ କାନ୍ଦିବାରୁ ତଣ୍ଟି ଚିପି ମାରିଦେଇଥିଲା ସରୋଜ । ପରୀର ମୃତଦେହ ସହ ଯୌନ ସଂପର୍କ ରଖିଥିଲା ସରୋଜ । ପରୀର ମୃତଦେହକୁ ଅଖାରେ ଭର୍ତ୍ତି କରି ପୋଖରୀରେ ଫିଙ୍ଗି ଦେଇଥିଲା ।

ପୂରା ଘଟଣା ବର୍ଣ୍ଣନା କରି ବୋଥ୍ରା କହିଛନ୍ତି ଯେ, ପରୀର ଘରଠାରୁ ସରୋଜର ଘର ପ୍ରାୟ ୨୦୦ ମିଟର ହେବ। ସରୋଜର ସାନ ଭଉଣୀ ସହିତ ପରୀର ଭଲ ସମ୍ପର୍କ ଥିଲା। ସରୋଜ ଘରେ ଥିବା ଜାମୁକୋଳି ଖାଇବାକୁ ଛୋଟ ପିଲାମାନେ ଯାଆନ୍ତି। ଜୁଲାଇ ୧୩ ତାରିଖ ଦିନ ପରୀ ତା’ ଘରକୁ ଜାମୁକୋଳି ଖାଇବାକୁ ଯାଇଥିଲା। ପରେ ୧୪ ତାରିଖ ଦିନ ନାବାଳିକା ଏକା ଜାମୁ କୋଳି ଖାଇବାକୁ ଯାଇଥିଲା। ସରୋଜର ବାପା ନାହାନ୍ତି। ମା’ ଆଉ ସାନ ଭଉଣୀ ଚାକିରି କରୁଥିବାବେଳେ ବଡ଼ ଭଉଣୀ ବିବାହ କରିସାରିଛନ୍ତି। ଘଟଣା ଦିନ କେହି ଘରେ ନ ଥିଲେ। ସରୋଜ ଏକୁଟିଆ ଘରେ ଥିଲା। ନାବାଳିକା କୋଳି ଖାଇବାକୁ ଯାଇଥିବାବେଳେ ସରୋଜ ତାକୁ ଘର ଭିତରକୁ ନେଇ ଦୁଷ୍କର୍ମ ଉଦ୍ୟମ କରିଥିଲା।

ମାତ୍ର ନାବାଳିକା ବାଧା ଦେବାରୁ ସରୋଜ ତା’ର ତଣ୍ଟି ଚିପି ହତ୍ୟା କରିଥିଲା। ମୃତ୍ୟୁ ପରେ ନାବାଳିକା ମୃତଦେହ ସହିତ ସରୋଜ ଦୁଷ୍କର୍ମ କରିଥିଲା। ଏହା ପୂର୍ବ ରାତିରେ ସରୋଜ ରାତିସାରା ଅଶ୍ଳୀଳ ଫିଲ୍ମ ଦେଖିଥିଲା ବୋଲି କହିଛି। ଦୁଷ୍କର୍ମ ପରେ ମୃତଦେହ ଏବଂ ତା’ର ଫ୍ରକ୍‌କୁ ଏକ ଝୋଟ ବସ୍ତାରେ ଭର୍ତ୍ତି କରିଥିଲା। ପରେ ତାହାକୁ ନେଇ ଘରଠୁ ପ୍ରାୟ ୩୦ ମିଟର ଦୂରରେ ଥିବା ଏକ ପୋଖରୀରେ ପକାଇ ଦେଇଥିଲା। ଝିଅର ଲେଗିଙ୍ଗ୍‌ସ ଘଟଣା ସ୍ଥଳରେ ପଡ଼ିଥିଲା। ତାକୁ ଫିଙ୍ଗିବାକୁ ସରୋଜ ଭୁଲି ଯାଇଥିଲା। ପରେ ସେ ଲେଗିଙ୍ଗ୍‌ସକୁ ନେଇ ପୋଖରୀରେ ପିଙ୍ଗିଥିଲା। ସେହି ଲେଗିଙ୍ଗ୍‌ସକୁ ଖୋଜିବା ଲାଗି ଆଜି ଉକ୍ତ ପୋଖରୀକୁ ଶୁଖାଯାଉଛି ବୋଲି ବୋଥ୍ରା କହିଛନ୍ତି।

ବୋଥ୍ରାଙ୍କ ସୂଚନା ଅନୁସାରେ, ସରୋଜ ସବୁବେଳେ ମୋବାଇଲ୍‌ ଫୋନରେ ଚାଇଲ୍ଡ ପର୍ନୋଗ୍ରାଫି ଫିଲ୍ମ ଦେଖୁଥିଲା। ପ୍ରମାଣ ନଷ୍ଟ ପାଇଁ ମୋବାଇଲ୍‌ର ସବୁ ସର୍ଚ୍ଚ ହିଷ୍ଟ୍ରୀ ଡିଲିଟ୍‌ କରିଦେଇଥିଲା। ବୋଥ୍ରା କହିଛନ୍ତି, ସରୋଜ ହେଉଛି ଘଟଣାର ମୁଖ୍ୟ ଅଭିଯୁକ୍ତ। ଘଟଣାର କୌଣସି ପ୍ରତ୍ୟକ୍ଷଦର୍ଶୀ ନାହାନ୍ତି। ସାଇଣ୍ଟିଫିକ୍‌ ପ୍ରମାଣକୁ ଭିତ୍ତି କରି ଅଭିଯୁକ୍ତକୁ ଧରାଯାଇଛି। ତାକୁ ରିମାଣ୍ଡରେ ନିଆଯିବ। ଘଟଣାରେ ଆଉ କାହାର ସମ୍ପୃକ୍ତି ରହିଛି କି ନାହିଁ ତାହାର ତଦନ୍ତ କରାଯାଉଛି ବୋଲି ବୋଥ୍ରା କହିଛନ୍ତି।

Leave a Reply

Your email address will not be published.